OPEN CALL ◆ Даследчая лабараторыя

ВЫКЛЮЧЭННЕ

EXCLUSION

Яе-перспектыва

◆ Верасень 2024 – май 2025 ◆ Дэдлайн 15 жніўня ◆

Women in Tech Academic у рамках Цэнтра гендарных даследаванняў Еўрапейскага гуманітарнага ўніверсітэту абвяшчае набор у даследчую лабараторыю “Выключэнне/Exclusion. Яе-перспектыва” для даследчы_ц з Беларусі, якія хацелі б рэалізаваць праект у сферы гендарных даследаванняў з фокусам на беларускім полі.

Даследчая лабараторыя

9-месячная праграма, накіраваная на тэмы выключэння і дыскрымінацыі, з якімі сутыкаюцца жанчыны ў ІТ. Гэтая лабараторыя ахоплівае індывідуальныя даследчыя праекты, сумесныя адукацыйныя сустрэчы і стварэнне калектыўнага практычнага прадукту (напрыклад, дапаможніка або праграмнага дакумента) на аснове індывідуальных даследаванняў і сумесных намаганняў.

◆ Дэдлайн 15 жніўня ◆

Мы прапануем

Грант у памеры да 4000 еўра на рэалізацыю самастойнага даследавання.

Кансультацыі эксперта_к для ажыццяўлення самастойнага даследавання і калектыўнага праекту.

Анлайн і афлайн адукацыйную праграму з мэтай пашырэння і паглыблення ведаў і навыкаў, неабходных у акадэмічнай/даследчай сферы.

Study visits: сумесныя сустрэчы і візіты ў экспертныя інстытуцыі і адукацыйныя арганізацыі.

Доступ да ІТ-кампаній і эксперта_к з ІТ-сферы.

ВЫКЛЮЧЭННЕ / EXCLUSION

Тэматычнае поле лабараторыі гэтага году вызначаецца паняццем ВЫКЛЮЧЭННЕ / EXCLUSION, якое мы разглядаем у звязцы з рознага тыпу дыскрымінацыямі, з якімі сутыкаюцца жанчыны ў высокатэхналагічнай / IT індустрыі. Рэгіён даследавання павінен быць звязаны з беларускім дыскурсам, лакалізаваным як унутры краіны, так і за яе межамі (міграцыя). Параўнаўчы фокус даследавання з іншымі сацыяльнымі і культурнымі кантэкстамі вітаецца.

Патэнцыяльныя вектары даследавання могуць быць звязаныя з:

Дыскрымінацыяй па ўзросце, сексуальнай арыентацыі альбо прафесійнаму досведу.

Сямейным статусам (дзеці).

Месцам пражывання (горад vs вясковая мясцовасць).

Сіндромам “самазванкі” як вынікам завышэння крытэрыяў чаканняў ад жанчын у параўнанні з мужчынамі.

Дыскрымінацыяй і жаночымі супольнасцямі.

Самадыскрымінацыяй.

Уплывам на здароўе (ментальнае і фізічнае).

Эканамічнымі наступствамі дыскрымінацыі.

Любымі іншымі перспектывамі ў межах тэматычнага поля (інавацыйныя і крэатыўныя падыходы вітаюцца).

Нягледзячы на прыярытэт праектаў звязаных з высокатэхналагічнай / IT сферай працы, прапановы з фокусам на дыскрымінацыі жанчын у іншых сферах таксама будуць разглядацца.

Першая сустрэча ўдзельніц лабараторыі адбудзецца 16-18 верасня 2024 у Вільнюсе. Працягласць лабараторыі – 9 месяцаў.
Мовы: беларуская/руская; некаторыя мерапрыемствы будуць праходзіць толькі на англійская мове.

Патрабаванні да ўдзельні_ц

Вышэйшая адукацыя (магістратура альбо кандыдацкая ступень);

Беларускае грамадзянства / від на жыхарства ў Беларусі альбо пацверджаныя сталыя сувязі з Беларуссю (калі ў вас асаблівы выпадак, калі ласка пішыце нам);

Веданне англійскай мовы ад B1/2;

Досвед правядзення даследаванняў альбо ўдзелу ў актывісцкіх праектах з выкарыстаннем гендарнай (фем-)оптыкі.

Перавага будзе аддавацца праектам з міждысцыплінарным падыходам і фокусам на тэхналогіях.

Калі ласка, дашліце сваю прапанову

На скрыню:

wint.conference2024@gmail.com

Тэма:

Даследчая лабараторыя

Прапанова павінна ўключаць

Назву праекта, анатацыю (300 слоў) і CV (пажаданы ліст публікацый, а таксама досвед удзелу ў даследчых/актывісцкіх праектах).

ДАСЛАЦЬ

◆ Дэдлайн 15 жніўня 2024 ◆

Куратаркі лабараторыі

Таня Арцімовіч

Erfurt University, Germany

Альміра Усманава

European Humanities University, Lithuania

Антаніна Сцебур

Women in Tech program, EHU

Women In Tech – гэта інфраструктурны адукацыйны і даследчы праект, накіраваны на падтрымку жанчын у ІТ, стымуляванне даследаванняў на стыку тэхналогій і фемінізму, а таксама прасоўванне гендэрнай роўнасці ў галіне высокіх тэхналогій. Праект ініцыяваны Цэнтрам гендарных даследаванняў ЕГУ і фінансуецца Еўрапейскім саюзам.